Çmimi “Banka më e mirë 2026” vlerëson institucionet që menaxhojnë më së miri asetet dhe detyrimet e tyre, duke investuar njëkohësisht në inovacion digjital dhe inteligjencë artificiale për të përmbushur nevojat në ndryshim të klientëve të tyre.
Joseph D. Giarraputo, themelues dhe drejtor editorial i Global Finance, në njoftimin për shtyp deklaroi:
“Sektori global bankar vazhdon të tregojë qëndrueshmëri pavarësisht paqëndrueshmërisë gjeopolitike, presionit rregullator dhe rritjes së konkurrencës nga fintech.”
Në procesin e përzgjedhjes janë marrë në konsideratë faktorë që varionin nga ata objektivë sasiorë deri te vlerësimet subjektive të informuara. Kriteret objektive përfshinin: rritjen e aseteve, përfitueshmërinë, shtrirjen gjeografike, marrëdhëniet strategjike, zhvillimin e bizneseve të reja dhe inovacionin në produkte. Kriteret subjektive përfshinin opinionet e analistëve të kapitalit, analistëve të vlerësimit të kreditit, konsulentëve bankarë dhe profesionistëve të tjerë të përfshirë në industri.
Të gjitha përzgjedhjet u bënë nga redaktorët e Global Finance pas konsultimeve të gjera me drejtues financiarë të korporatave, bankierë, konsulentë bankarë dhe analistë në mbarë botën.
Gjithashtu, bankat fituese paraqitën dokumenta për të mbështetur përzgjedhjen e tyre. Fituesit e këtij viti janë bankat që i kushtuan vëmendje të veçantë nevojave të klientëve të tyre në tregje të vështira dhe arritën rezultate të forta duke vendosur njëkohësisht bazat për suksesin e ardhshëm.